အင်္ဂလိပ်တို့က မြန်မာနိုင်ငံကို သူတို့၏ ကျွန်နိုင်ငံဖြစ်လေပြီဟု ၁၈၈၆ ခု၊ ဇန်န၀ါရီလ (၁) ရက်နေ့တွင် ကြေညာ သည်။ မြန်မာများက လက်မခံပါ။ သူ့ကျွန်မခံပြီဟု ပြန်လည်တိုက်ခိုက်ကြလေသည်။ သေနတ်နှင့် အုပ်ချုပ်သော အင်္ဂလိပ်အစိုးရကို ဓားများ၊ လှံများနှင့် ပြန်လည် တိုက်ခိုက်ခဲ့ကြ၏။
ရဲရင့်စွာ တိုက်ခိုက်သော မြန်မာသူပုန်များကို အင်္ဂလိပ်တို့က စစ်အင်အားကြီးမားစွာ အသုံးပြုကာ ချေမှုန်းတိုက်ခဲ့ရလေသည်။ ထိုစဉ်က လူဦးရေ သုံးသန်းသာရှိသော အထက်မြန်မာလူထုကို အင်္ဂလိပ်စစ်ပုလိပ် (၁၇၃၈၆) ဦးနှင့် နှိမ်နင်းရလေရာ မြန်မာ (၁၇၃)ဦးတွင် အင်္ဂလိပ်စစ်သား တဦးနှုန်း စောင့်ကြပ်နှိမ်နင်းရပါသည်။ အိန္ဒိယပြည်၊ ဘင်္ဂလားနယ်တွင် တိုင်းရင်းသား (၂၉၀၂) ဦးတွင် အင်္ဂလိပ်စစ်သားတဦးနှုန်း ထိန်းကွပ်ရသည်နှင့် နှိုင်းစာပါက မြန်မာများ မည်မျှလှုပ်ရှားခဲ့သည်ကို ခန့်မှန်းနိုင်ပါ၏။
အင်္ဂလိပ်တို့အဖို့ ငြိမ်းချမ်းရေးရရှိရန်၊ တရားဥပဒေစိုးမိုးသည့် အစိုးရဖြစ်မြောက်ရန် နှစ်ပေါင်း များစွာ အားထုတ်ရလေသည်။ ၁၉၀၀ ပြည့်နှစ်ကာလ ရောက်ရှိလေမှ လက်နက်နှင့် ပြန်လည်တိုက်ခိုက်ထကြွမှုများ ငြိမ်သက်သွားကာ အင်္ဂလိပ်အစိုးရအဖို့ ထိရောက်စွာ အုပ်ချုပ်နိုင်ခဲ့သည်။ ထိုအချိန်လောက်တွင်ပင် မြန်မာသတင်း စာများ ပေါက်ဖွားလာလေသည်။ သတင်းစာများက ဓားလှံလေးမြား အမြောက်သေနတ်များကို အသုံးမပြုဘဲ စကားလုံးများကို လက်နက်အဖြစ်သုံးကာ ကျွန်ဘ၀မှ လွတ်မြောက်ရေးကို တိုက်ခိုက်ခဲ့ကြသည်။
မြန်မာများအဖို့ အသက်ဦးဆံပိုင် ဘုရင်စနစ်ကို မကျေနပ်ခဲ့ကြစေကာမူ ကိုယ့်မင်းကိုယ့်ချင်း ဘ၀တွင် နေထိုင်လိုကြသည်။ အင်္ဂလိပ်လက်အောက်တွင် စားဝတ်နေမှုတိုးတက်လာစေကာမူ နိုင်ငံ၏ သယံဇာတ များကို လူမျိုးခြားတို့က သွေးစုပ်နေသည်ကို လက်မခံနိုင်ပါ။ ကျွန်ဘ၀တွင် စိတ်ပျော်၊ ကိုယ်ပျော်မနေနိုင်ကြပါ။
အင်္ဂလိပ်တို့က အိန္ဒိယမှ ခေါ်လာသော အိန္ဒိယအမျိုးသားစာရေးစာချီများနှင့် အုပ်ချုပ်သည်ကိုလည်း မကျေနပ်နိုင်ကြပေ။ မြန်မာပညာတတ်များအဖို့ အင်္ဂလိပ်တို့ အုပ်ချုပ်ရေးစနစ်အောက်၌ နေရာမရှိ ဟူသည့် အချက်ကို မြန်မာများသိရှိလာစေရန် မြန်မာသတင်းစာများက ရေးသားညွှန်ပြကြသောကြောင့် မြန်မာပညာတတ် များ အသိညာဏ်ပွင့်လာပြီး နိုင်ငံရေးလှုပ်ရှားမှုများ ပေါ်ပေါက်လာလေသည်။ ယင်းလှုပ်ရှားမှုများကို သတင်းစာများ ကပင် ဦးဆောင်ခဲ့သည်။
မြန်မာတို့အကျိုးကို ရှေ့ရှုသော ဗမာပိုင်သတင်းစာများနှင့် အင်္ဂလိပ်ကုမ္ပဏီများ အကျိုးစီးပွားကို ရေးသားစေကာမူ သစ္စာတရားကို အခြေခံသော လူမျိုးခြားပိုင် သတင်းစာများက လူမှုလှုပ်ရှားမှုသတင်းများ ရေးသား ဝေဖန်စပြုကြသည်။ လွတ်လပ်စွာ ရေးသားပြောဆိုခွင့်ရှိကြစေကာမူ အင်္ဂလိပ်အစိုးရ ဗျူရိုကရက်များက သတင်းစာများနှင့် နိုင်ငံရေးလှုပ်ရှားမှုများကို ဖိနှိပ်ကြရပြန်သည်။
“ဘုရင်ကိုဖြစ်စေ၊ ဘုရင်က တရားဥပဒေအရ ခန့်ထားသော အစိုးရကိုဖြစ်စေ မုန်းတီးစေရန်၊ မလေးမခန့်ဖြစ်စေရန် လှုံ့ဆော်သည်ဖြစ်စေ၊ လှုံ့ဆော်ရန် အားထုတ်သည်ဖြစ်စေ၊ မည်သူမဆို စကားလုံးနှင့် ရေးသားသည်ဖြစ်စေ၊ နှုတ်ဖြင့် ပြောသည်ဖြစ်စေ၊ အချက်လက္ခဏာပြ၍ဖြစ်စေ၊ သိမြင်စေရန် ပြသသည်ဖြစ်စေ၊ အားထုတ်သည်ဖြစ်စေ အောက်ပါပြစ်ဒဏ်များကို ချမှတ်စေရမည်” ဟု အိန္ဒိယရာဇသတ်ကြီးပုဒ်မ ၁၂၄ (က) မှာ အသေးစိတ်ရေးထားသည်။
လူတယောက်အဖို့ မျက်စေ့မှိတ်ပြရုံမျှနှင့် အင်္ဂလိပ်ဘုရင်နှင့် အစိုးရကို အကြည်ညိုပျက်စေသည်ဟု တစုံတယောက်က ထင်မြင်ယူဆလေပါက အလုပ်ကြမ်းနှင့် ထောင်ဒဏ် (၂)နှစ်မှ (၅)နှစ်အထိ အပြစ်ပေးခံရ နိုင်သည်။
ထိုကဲ့သို့ လက်ရောခြေပါ တုတ်နှောင်ထားသည့် ဥပဒေဆိုးများကို မြန်မာများက ကန့်ကွက်ဆန္ဒပြ ကြသည်။ တို့ဗမာအစည်းအရုံးခေါင်းဆောင်တဦးဖြစ်သူ သခင်လှမောင်က စာတိုက်မှ စာပို့ရာတွင် အင်္ဂလိပ်ဘုရင် ၏ ပုံပါသော တံဆိပ်ခေါင်းကို ဇောက်ထိုးကပ်ပြီး စာထည့်ပါသည်။ “ခွေးခေါင်းပြောင်းပြန်ကပ်သည်” ဟုလည်း စာအိပ်ပေါ်တွင် သိသာထင်ရှားစွာ ရေးလိုက်ပါသေးသဖြင့် ဘုရင်မင်းမြတ်ကို အကြည်ညိုပျက်စေမှုနှင့် အလုပ်ကြမ်းနှင့် ထောင်ဒဏ် (၅)နှစ် အပြစ်ပေးခဲ့လေသည်။
သခင်လှမောင်သည် အလားတူ နယ်ချဲ့ဆန့်ကျင်ရေးလှုပ်ရှားမှုများကို ပြုခဲ့သေးသည်။ အမှုအမျိုးမျိုး နှင့် ထောင်အကြိမ်ကြိမ်ကျခံခဲ့ရာမှ ခုနစ်ထောင်စံ သခင်လှမောင်ဟု ဘွဲ့ထူးပေးခံခဲ့ရလေသည်။ သခင်လှမောင်နှင့် တကွ တို့ဗမာအစည်းအရုံးခေါင်းဆောင်များ အားထုတ်မှုများနှင့် အထက်က ဗုဒ္ဓဘာသာကလျာဏယုဝအသင်း လှုပ်ရှားမှုများ စသည်တို့ကို သတင်းစာများက ဦးဆောင်အားပေးခဲ့လေသည်။ အဓိကရည်မှန်းချက်မှာ ဖိနှိပ်သော ဥပဒေများ မရှိတော့မည့် လွတ်လပ်သော မြန်မာနိုင်ငံတော်တည်ဆောက်ရေးဖြစ်ပေသည်။
အစဉ်အဆက် အားထုတ်ကြိုးစားခဲ့ကြရာမှ လွတ်လပ်သော နိုင်ငံသစ်ကို တည်ဆောက်နိုင်ခဲ့ကြ သော်လည်း ၁၈၆၁ ခုနှစ်က အိန္ဒိယပြည်၊ အရှေ့အိန္ဒိယကုမ္ပဏီအစိုးရခေတ်က ရေးသားအတည်ပြုခဲ့သော လူထုကို ဖိနှိပ်ချုပ်ချယ်သော ဥပဒေများသည် ယနေ့ယခုထက်တိုင် ရှင်သန်ကြီးထွားနေပေသေးသည်။ စစ်အစိုးရများ တက်လာချိန်တွင် ယင်းဥပဒေဆိုးများသည် စစ်အစိုးရတို့အဖို့ များစွာ အသုံးဝင်သော ဥပဒေများဖြစ်နေပေတော့ သည်။ ဖိနှိပ်ချုပ်ချယ်မှုများ ဆက်လက်တည်ရှိနေသေး၏။ ။
No comments:
Post a Comment