Saturday, February 23, 2008

ဒိန်းမတ် နိုင်ငံ နှင့် မိုဟာမက် ကာတွန်းပြဿနာ

၂၀၀၅ ခုနှစ်က ဒိန်းမတ်မှာ တမန်တော်မိုဟာမက် ရုပ်ပြောင်ကာတွန်းတွေ သတင်းစာတစောင်မှာဖော်ပြလိုက် လို့ ပြဿနာတွေ ဖြစ်တော့ ကျနော်တို့က ဒိန်းမတ်ရောက်တာ ဘာမှမကြာသေး။ အဲဒီသတင်းစာကို ကြည့်ချင်လို့ ကျနော် အက်စ်ဘီးယားမြို့က စာကြည့်တိုက်မှာ သွားတောင်းကြည့်ဘူးသည်။
ဖြစ်ပုံက သတင်းစာအယ်ဒီတာနဲ့ ကျောင်းသုံးစာအုပ်ထုတ်ဝေရေးဌာနက ပုဂ္ဂိုလ်တို့စကားစပ်မိရာက စတင်ခဲ့တယ်လို့ သိရပါတယ်။ စာသင်ကျောင်းတွေမှာ ခလေးတွေကို ကမ္ဘာပေါ်က ကိုးကွယ်ရာဘာသာ အသီးသီး နဲ့ မိတ်ဆက်ဖို့ ကျောင်းသုံးစာအုပ်စီစဉ်ရာမှာ တမန်တော်မိုဟာမက်ပုံ ဆွဲထားတာကို ရှာလို့မတွေ့တဲ့ အကြောင်း သတင်းစာအယ်ဒီတာက သိသွားပြီး ကာတွန်းဆရာတွေကို တမန်တော်မိုဟာမက်ပုံ ကယ်ရီကေးချား ဆွဲခိုင်းပြီးတော့ သတင်းစာမှာ ဖော်ပြလိုက်တာပါပဲ။
သတင်းစာမှာ ကာတွန်းပုံတွေပါလာတော့ ဒိန်းမတ်နိုင်ငံမှာရှိတဲ့ မွတ်ဆလင်နိုင်ငံက သံအမတ်တွေက အဲဒီကိစ္စ ကို တားမြစ်အရေးယူပေးဖို့ ၀န်ကြီးချုပ်နဲ့ တွေ့ခွင့်တောင်းပါတယ်။ ၀န်ကြီးချုပ်က သူ့အနေနဲ့ သတင်းစာ အယ်ဒီတာကို တားမြစ်လို့ မရတာရယ်၊ တရားဥပဒေအရ အရေးယူမယ်ဆိုရင် သူနဲ့ မဆိုင်တာကြောင့် သံအမတ်တွေရဲ့ တွေ့ခွင့်တောင်းတဲ့ကိစ္စကို ငြင်းပယ်လိုက်ပါတယ်။
ဝန်ကြီးချုပ်က သူနဲ့မဆိုင်သလိုနေလိုက်တာကို မကျေနပ်တဲ့ အစ္စလာမ်ဘာသာရေးဆရာတွေက ကာတွန်းတွေကို ယူပြီး အရှေ့အလယ်ပိုင်းက နိုင်ငံတွေမှာလှည့်လည်ပြီးတော့ ဒိန်းမတ်ကို ဘယ်လို တုန့်ပြန် မလဲဆိုတာ ဆွေးနွေးပါတယ်။ (ဒီနေရာမှာ အငြင်းပွားဖွယ်ရာတွေ့ရှိရတာက သတင်းစာမှာပါတဲ့ ကာတွန်း (၁၂) ပုံအပြင် တခြားဆိုးဆိုးဝါးဝါး ပုံတွေပါ ယူသွားတယ်ဆိုတာပါ။ ဇတ်ပိုနာအောင်များ လုပ်ခဲ့သလားဆိုတာတော့ ဗလီဆရာတွေပဲ သိပါလိမ့်မယ်။)
ပထမဆုံး အာရပ်နိုင်ငံတွေက ဒိန်းမတ်ရဲ့ သွင်းကုန်တွေကို သပိတ်မှောက် ကြတာက စပါတယ်။ ဒိန်းမတ်ကတင်သွင်းတဲ့ နို့နဲ့ နို့ထွက်ပစ္စည်းတွေကို အာရပ်နိုင်ငံတွေရဲ့ စူပါမားကပ်တွေက စတင် ဖယ်ရှားကြပါတော့တယ်။ အဲဒီကိစ္စဟာ တစတစပိုကျယ်ပြန့်သွားပြီးတော့ ကမ္ဘာပေါ်က မူဆလင်နိုင်ငံတွေ က ဒိန်းမတ်ကို ဆန္ဒပြတော့တာပဲ။ ဒိန်းမတ်အလံတွေ မီးရှို့ခံရတယ်၊ တချို့နိုင်ငံတွေမှာ ဒိန်းမတ်သံရုံးပါ ဖျက်ဆီးခံရပါတယ်။ ဒေါသထွက်နေတဲ့ မူဆလင်ဘာသာဝင်တွေကို ဒိန်းမတ်ဝန်ကြီးချုပ်နဲ့ ကာတွန်း တွေဖော်ပြခဲ့တဲ့သတင်းစာက တောင်းပန်ပါတယ်။
တမန်တော်မိုဟာမက်ကာတွန်းပြဿနာဟာ ဒိန်းမတ်နိုင်ငံအတွက်တော့ ဒုတိယကမ္ဘာစစ်ပြီးနောက်ပိုင်း အကြီးမားဆုံးနိုင်ငံရေး အကျပ်အတည်းဖြစ်သွားခဲ့ပါတယ်။
အခုတခါ သက္ကရာဇ် ၂၀၀၈ ကို ရောက်ပြန်တော့ ဒီလထဲမှာပဲ ကာတွန်းဆရာ (၁၂) ယောက်ထဲက တယောက်ကို လုပ်ကြံသတ်ဖြတ်ဖို့ စီစဉ်တဲ့သူ သုံးယောက်ကို ဒိန်းမတ်ရဲစုံထောက်အဖွဲ့က ဖော်ထုတ်ဖမ်းဆီး လိုက်ပါတယ်။ ကြံစည်သူ သုံးယောက်မှာ တယောက်က ဒိန်းမတ်သူနဲ့လက်ထပ်ထားလို့ နိုင်ငံသားဖြစ်နေသူ၊ ကျန်တဲ့ ၂ ယောက်ကတော့ ဒိန်းမတ်မှာနေထိုင်ခွင့်ရထားတဲ့ တူနီးရှားနိုင်ငံသားတွေလို့ သိရတယ်။ ကာတွန်း ဆရာကို သတ်ဖို့ကြံစည်တဲ့အမှုကို ဝေဖန်ရေးသားကြရင်းနဲ့ သတင်းစာတွေက မိုဟာမက်ကာတွန်းတွေကို ထပ်မံဖော်ပြကြပါတယ်။ အဲဒီတော့ တခါ မူဆလင်ဘာသာဝင်တွေရဲ့ ဒေါသထွက်ဆန္ဒပြတာတွေ ထပ်ဖြစ်လာပြန် တာပေါ့။ ပြည်ပနိုင်ငံတွေမှာ ဆန္ဒပြနေသလို ပြည်တွင်းမှာလည်း မီးတွေ့လိုက်ရှို့နေကြပါတယ်။
အခုစာရေးနေစဉ်မှာပဲ အာရှ၊ အာဖရိကနဲ့ အရှေ့အလယ်ပိုင်းက နိုင်ငံတွေမှာ ဆန္ဒတွေပြနေကြပါတယ်။
ဒိန်းမတ်နိုင်ငံရဲ့ မြို့ကြီးတွေမှာ ရှစ်ရက်လောက် ဆက်တိုက်နီးပါး ညဖက်တွေမှာ မီးတွေလောင်နေခဲ့ပါတယ်။ အမှိုက်ပုံးတွေ၊ ကားပါကင်မှာ ရပ်ထားတဲ့ကားတွေ၊ စာသင်ကျောင်းတွေ မီးရှို့ခံရပြီးတော့ မီးလိုက်ရှို့နေသူတွေက မူဆလင် ဘာသာဝင် ဆယ်ကျော်သက်တွေလို့သိရပါတယ်။ တချို့ကိုလည်း ရဲက ဖမ်းထားပါတယ်။ ပျက်ဆီးဆုံးရှုံးမှုတွေ က ကာလတန်ဘိုးငွေမနည်းသလို မကျေနပ်မှုတွေကလည်း မပြီးဆုံးသေးပါဘူး။
ဒိန်းမတ်လူမျိုးတွေနဲ့ပတ်သက်ပြီး ကျနော်သိရသလောက်တော့ သူတို့တွေဟာ ခရစ်ယာန်ဘာသာဝင်တွေ ဆိုပေမယ့် သူတို့ကိုးကွယ်တဲ့သာသာအပေါ်မှာလည်း သိပ်အလေးအနက်မရှိကြပါဘူး။ မင်္ဂလာဆောင်နဲ့ အသုဘ ရှိမှသာ ဘုရားကျောင်းကိုသွားကြပါတယ်။ ဒိန်းမတ်လူငယ်တယောက်နဲ့စကားပြောကြည့်တော့ `သမ္မာကျမ်းစာမှာ ပထမတရွက်ဖတ်ပြီးလို့ နောက်တရွက်လှန်တာနဲ့ အမှားတွေ့တော့တာပဲတဲ့´။ ကိုယ်ကိုးကွယ်တဲ့ ဘာသာတောင်မှ အလေးအနက်မရှိလေတော့ တခြားသူတွေရဲ့ ဘာသာရေးအယူအဆအစွဲ အလမ်းတွေကိုလည်း သူတို့ ခံစားနားလည်နိုင်မှုမရှိကြဘူးလို့ပဲ ဆိုရပါလိမ့်မယ်။
စစ်အေးတိုက်ပွဲပြီးလို့ ကမ္ဘာပေါ်မှာ ထပ်မံကြုံတွေ့ရမယ့် ပဋိပက္ခဟာ ယဉ်ကျေးမှုတို့ တိုက်မိခြင်းသာ ဖြစ်မယ် ဆိုရင် တဖက်နဲ့ တဖက် ဆင်ဆင်ခြင်ခြင် ရှိကြရလိမ့်လို့ ယူဆမိကြောင်းပါ.. ။ ။

Saturday, February 16, 2008

ကျနော်သိသော `ဗဒို´တဦး

မဲဆောက်မှာ လုပ်ကြံခံလိုက်ရတဲ့ ဗဒိုမန်းရှာကို လူချင်းမသိပါဘူး။ ဒါပေမယ့် သူပြောတာ ဆိုတာ နားထောင် ကြည့်တော့ အတွေ့အကြုံရှိတဲ့ တော်လှန်ရေး သမားတဦးဆိုတာရယ် ရပ်တည်ချက်မှန်ကန်တဲ့နိုင်ငံရေးသမား တဦးဆိုတာရယ် သိသာထင်ရှားစွာ တွေ့နေရပါတယ်။ အဲလိုလူမျိုး လုပ်ကြံခံလိုက်ရတယ်ဆိုတာ ကရင့်တော် လှန်ရေးအတွက်ရော မြန်မာ့ ဒီမိုကရေစီအရေးအတွက်ပါ ၀မ်းနည်းဖွယ်ရာ ဆုံးရှုံးမှုတခုပါပဲ။
ဗဒိုမန်းရှာကို မဆုံလိုက်ရပေမယ့် ကိုယ်တောခိုတုံးကတော့ ဗဒိုတဦးဖြစ်တဲ့ ဗဒိုသန်းအောင်ကို သိခဲ့ရပါတယ်။ ကိုယ်တို့ရောက်နေတဲ့ ကရင်တပ်မဟာ (၇) တပ်ရင်း (၂၁) ဖြစ်တဲ့ မဲတရေ စခန်းကို ကေအင်ယူ ဒု ဥက္ကဋ္ဌ အဖြစ် ဗဒိုသန်းအောင် ရောက်လာခဲ့တာပါ။ ၁၉၈၈ ခု စက်တင်ဘာ (၁၈) ရက်နေ့ စစ်အာဏာသိမ်းပြီးချိန်က စပြီး နယ်စပ်ကို တဖွဲဖွဲ ထွက်လာခဲ့ကြတာဆိုတော့ ကိုယ်တို့ မဲတရေ ရောက်တဲ့ အောက်တိုဘာ (၁) ရက်နေ့ မဲတရေစခန်းမှာ ကျောင်းသား (၅၀၀) ကျော်လောက်ရောက်နေကြပါပြီ။ အများစုက ကရင်ပြည်နယ် ဖားအံ၊ လှိုင်းဘွဲ့၊ ရွှေဂွန်းစတဲ့ မြို့နယ်က တက်လာခဲ့တဲ့ ကျောင်းသားသပိတ်က အဖွဲ့တွေ များပါတယ်။ နောက်တခြား ရန်ကုန်နဲ့ ပဲခူးတိုင်းအတွင်းက ထွက်လာခဲ့တဲ့သူတွေ ရှိကြပါတယ်။ လက်နက်နဲ့ စစ်ပညာ ရရင် ပြည်တွင်း ပြန်ဝင်ဖို့ ရည်ရွယ်ချက်နဲ့ ထွက်လာခဲ့ကြပေမယ့် ကေအင်ယူစခန်းမှာ ပိတ်မိသလို ဖြစ်နေပြီး ရှေ့ကို ဘာဆက် လုပ်ရမှန်းမသိ ဖြစ်နေတဲ့ အချိန်ပါ။ တချို့က ထိုင်းကို ကူးမယ်၊ တခြားစခန်းတွေကို ရောက်သွားတဲ့ အသိတွေ နဲ့ အဆက်အသွယ်ရှာမယ်။ နိုင်ငံတကာကို အကူအညီတောင်းမယ် စသဖြင့် စိတ်ကူးကြသူတွေလည်း ရှိကြတယ်။ နယ်စပ်စခန်းတွေကို ပြည်တွင်းက ကျောင်းသားတွေ အလုံးအရင်းနဲ့ ရောက်နေတာကို ကမ္ဘာ့သတင်း ဌာနတွေကလည်း စိတ်ဝင်စားတယ်လေ။ တနေ့ တနေ့ ရောက်လာတဲ့ သတင်းထောက်တွေက လည်း မနဲဘူး။ သတင်းထောက်တွေက မြင်သမျှကို တီဗီရိုက်၊ တွေ့သမျှလူကို အင်တာဗျူးတာ ဆိုတော့ ကိုယ်တောင် သြစတေးလျက သတင်းဌာန တခုဖြစ်တဲ့ အေဘီစီ နဲ့ အမေးအဖြေလုပ်လိုက်သေးတယ်။ ကိုယ်ပြောတဲ့ အင်္ဂလိပ်စကားက တောင်တလုံးမြောက်တလုံးပါ။ အဲဒီမှာ တချို့ အင်္ဂလိပ်လို အတော်လေး ပြောနိုင်သူတွေပါတယ်။ အဲဒီထဲက တယောက်က သတင်းထောက်တယောက်ကို ဘာပြောလိုက်သလဲ ဆိုတော့ ကေအင်ယူက ပိတ်ပင်ထားလို့ သွားချင်တဲ့နေရာ သွားလို့မရဘူးဖြစ်နေတဲ့အကြောင်း ပြောလိုက်တာပါပဲ။
နောက်နေ့ကျတော့ အဲဒီသတင်းက ဘန်ကောက်ပို့စ် မှာပါလာတယ်ဆိုတော့ ကေအင်ယူရဲ့ ဒု ဥက္ကဋ္ဌ ဖြစ်တဲ့ ဗဒိုသန်းအောင် ကိုယ်တိုင် စခန်းကိုရောက်လာပြီး အဲဒီကိစ္စကို ဖြေရှင်းပါတော့တယ်။ မဲတရေစခန်းမှာ ကိုယ်တို့အဖွဲ့တွေ ယာယီစခန်းချနေတာက အလယ်တန်းကျောင်းတခုမှာ၊ အဲဒီကျောင်းရဲ့ နှစ်ထပ်ဆောင် အောက်ထပ်ခန်းမ လူစုပြီးတော့ မြန်မာလိုကောင်းကောင်းမိန့်ခွန်းချွှေပါတော့တယ်။ သူက မြန်မာစကားပြော နိုင်ပေမယ့် တပ်ရင်းမှူးဗိုလ်မှူးလားမူက ကျနော်တို့ကို စကားပြောရင် ကရင်လိုပဲ ပြောပါတယ်။ သူက ကရင်လို ပြော.. တယောက်က မြန်မာလို ဘာသာပြန်တယ်ပေါ့။ အဲဒါကို ညဖက်အဆောင်မှာ အခုသြစီရောက်နေတယ် လို့သိရတဲ့ ကိုပေါ က ဗိုလ်မှူးလားမူ လုပ် နောက်တယောက်က စကားပြန်လုပ်ပြီဆိုရင် ပြဇတ်ထွက်သလို ဖြစ်နေတာမို့ တ၀ါးဝါးနဲ့ ရီနေရပါတယ်။ လူတွေကလည်း ဘာမှ အလုပ်ရှိတာ မဟုတ်၊ အားနေကြတယ် မို့လား။
ဗဒိုသန်းအောင်က ကေအင်ယူရဲ့ရပ်တည်ချက်၊ ဖြတ်သန်းမှုသမိုင်းကြောင်း၊ လမ်းစဉ် နဲ့ လုပ်ငန်းစဉ်တွေကို အကျယ်တ၀င့်ရှင်းပြပါတယ်။ ပြီးတော့ ဘန်ကောက်ပို့စ် သတင်းစာမှာ ပါလာတဲ့ ကိစ္စ အစာမကြေတဲ့အကြောင်း၊ ကျောင်းသားတွေကို ထိုင်းဖက်ကမ်းကူးခွင့်မပြုတာက တဖက်နိုင်ငံရဲ့ လူဝင်မှု ဥပဒေနဲ့ ငြိစွန်းမှာမို့ တားမြစ်ရတာ ဖြစ်ကြောင်း ပြောပါတယ်။ ကျောင်းသားကိုယ်စားလှယ်ကလည်း ကျောင်းသားတွေရဲ့ ဆန္ဒကို ရိုးသားစွာ တင်ပြတော့မှ အားလုံးကိုတော့ သွားခွင့်မပြုနိုင်၊ အားလုံးကိုယ်စား ကျောင်းသား (၇)ယောက်ကို အဆက်အသွယ်ရှာဖို့ မဲဆောက်သွားခွင့်ပြုမယ်လို့ ပြောပြီး ဗဒိုသန်းအောင် ပြန်သွားပြီးနောက်ပိုင်း ကျနော်လည်း တော်လှန်ရေး နယ်မြေမှာ မရှိတော့တာမို့ နောက်ထပ် တွေ့ဆုံခြင်း မရှိတော့ပါ ခင်ဗျား... ။ ။


(ထိုင်းဖက်ကမ်းကူးရန်ပြင်နေသည့် ကျောင်းသားများ၏ နောက်တွင် သောင်ရင်းမြစ်၊ သောင်ရင်းမြစ်နောက်က မဲတရေ စခန်းဖြစ်သည်)

Saturday, February 9, 2008

မြန်မာတို့အကြိုက် ရမ်ဘို

`ရမ်ဘိုရုပ်ရှင်သည် မြန်မာစစ်အစိုးရအတွက် နိုင်ငံရေး ထိုးနှက်ချက်´ ခေါင်းစဉ်ဖြင့် စင်္ကာပူတွင် မြန်မာ ၆၀၀ ကျော် ရုပ်ရှင်တရုံလုံးအပြတ်ငှားကာ ရမ်ဘိုရုပ်ရှင်အား ကြည့်ရှုအားပေးကြသည့် အကြောင်း ဒိန်းမတ်နိုင်ငံမှ ဖေဖော်ဝါရီ ၅ ရက်နေ့ထုတ် Metro Xpress သတင်းစာတွင် ဖော်ပြထားသည်ကို တွေ့ရပါသည်။
ရုပ်ရှင်ထဲက ရမ်ဘိုကဲ့သို့ မြန်မာနိုင်ငံကို ကယ်တင်ပေးမည့် သူရဲကောင်းကို မြန်မာတို့ အလိုရှိနေကြောင်း.. စက်တင်ဘာအရေးအခင်းအား ရက်စက်စွာ ဖြိုခွင်းခဲ့သည့် စစ်တပ်အား ပြန်လည် လက်စားချေသည့် ရမ်ဘို၏ ဆောင်ရွက်ချက်တို့ကြောင့် မြန်မာတို့ အားတက်ကြရကြောင်း.. ရုပ်ရှင်ပြသနေစဉ်အတွင်း မြန်မာစစ်သားများကို ရမ်ဘိုက ပြန်လည်သတ်ဖြတ်သည့် အခန်းတွင် တရုံလုံး အော်ဟစ်အားပေးကြကြောင်း စသည်ဖြင့် ရေးသား ထားပါသည်။

Saturday, February 2, 2008

၂၀၀၇ ဒိန်းမတ် သင်္ကြန်

မလေးရှားအိမ်မက်

မလေးရှားအိမ်မက်

မိုး … မိုး … ဒီမိုးက တော်တော်ပြင်းပြင်းထန်ထန် ရွာနေတာပါလား။ လျှပ်စီးက တဖြတ်ဖြတ်၊ မိုးက တချုံးချုံးနဲ့ ကောင်းကင်ပဲ ပြိုကျတော့မလို လျှပ်စီးတချက် လျှက်လိုက်တိုင်း `ဟ… ငါတောင် မိုးကြိုးစက်ကွင်းက လွတ်ပါ့မ လား´။ ကောင်းကင်ကို မော့မကြည့်ရဲတဲ့အဖြစ်၊ ဒီလိုရွာပုံမျိုး ကျနော်တို့ နိုင်ငံတွင် မကြုံဘူးတာအမှန်၊ အေးလေ .. ကျနော်တို့ နိုင်ငံက ရာသီဥတုမျှတတာကိုး၊ ရာသီဥတုရယ်လို့ မရှိတဲ့ ဒီမလေးရှားနိုင်ငံကို ရောက် နေတော့လည်း ဒီမိုးမျိုးနဲ့ ကြုံရတာ မဆန်းလှပါ။
မိုးကောင်းကောင်းနဲ့ တွေးနေတုံး `ဘာဒေ့ … ဘာဒေ့´ ဆိုတဲ့ ငှက်ဆိုးထိုးသံတွေကြောင့် လူစစ်ဖို့ တန်းစီရမယ်လို့ ကျနော်သိလိုက်သည်။ ကျနော် အခုရောက်နေတဲ့နေရာက `ကမ့်´လို့ အများခေါ်နေကြတဲ့ တရားမ၀င် ၀င်ရောက်လာသူနဲ့ အိုဗာစတေးတွေကို ထိန်းသိမ်းထားတဲ့နေရာတခု ဖြစ်သည်။ အားလုံး သူ့နေရာနဲ့သူ နိုင်ငံအလိုက် တန်းစီအပြီးမှာတော့ ပြောက်ကျားဝတ်စုံနဲ့ တုတ်တချောင်းကိုင်ထားတဲ့ အရာရှိ ၀င်လာသည်။ သူနဲ့အတူ ကိုယ်ရံတော် လေးယောက်ခြံရံလာပြီး လူစစ်သည်။ ဒီအချိန်မျိုးမှာ တန်းမစီလို့ကတော့ တုတ်စာကောင်းကောင်းမိလိမ့်မည်။ အခုလို နှစ်ထပ်ဆောင် ဟောခန်းကြီးမှာ နိုင်ငံပေါင်းစုံက လူတွေ စုစုပေါင်း ခွန်နှစ်ရာ ရှစ်ရာလောက်ရှိတာဆိုတော့ တုတ်ကိုင်ပြီး ထိမ်းတာတောင် ညအိပ်ခါနီးရင် နေရာလုရင်း ရန်ဖြစ်ကြ၊ ဆူညံဆူညံနဲ့ စကားတွေများကြ၊ တယောက်နဲ့ တယောက် မတော်တဆ လူချင်းတိုက်မိရင်တောင် `မင်းဘာ ကောင်လဲ.. ငါဘာကောင်လဲ´ နဲ့ ရန်ထောင်ကြ ဆိုတော့ ပြဿနာပေါင်းစုံက အမြဲတမ်း ရှိနေတတ်သည်။ ဒဏ် ပေးခံထိ၊ တုတ်နဲ့ ရိုက်ခံထိတာတွေကလည်း နေ့တိုင်းနီးပါး တွေ့နေရသည်။
ယူနီဖောင်းနဲ့ ပုဂ္ဂိုလ်တွေ လူစစ်ပြီး ပြန်သွားတော့ အချိန်က ည ၁၂ နာရီခွဲပါပြီ။ လေးနာရီခြား တခါ လူစစ်တာဆိုတော့ မနက်လေးနာရီမှာ သူတို့ ပြန်လာကြအုံးမည်။ အပြင်မှာကလည်း မိုးကရွာတုန်းဆိုတော့ မိုးအေးအေးနဲ့ ကျနော့်အတွေးများက အတိတ်ကို ပြန်သွားနေသည်။
`သား … ကျန်းမာရေးကို ဂရုစိုက်နော်´ အမေက အထပ်ထပ်မှာနေသည်။ `မောင်လေး… ဟိုရောက် ရင် ရန်တွေဘာတွေ မဖြစ်နဲ့.. လိမ်လိမ်မာမာနေ´ မမက သတိပေးသည်။ `အေးပါဟာ.. ငါသိပါတယ်´ ကျနော် ပြန်ပြောသည်။ အဖေကတော့ ကြည့်ရုံသာကြည့်နေပြီး ဘာမှ မပြော။ လေယာဉ်ထွက်ဖို့က တနာရီလောက် လိုသေးသည်။ ကျနော့် စိတ်ထဲမှာတော့ `သားရဲ့ ရည်မှန်းချက်တွေပြည့်မှ ပြန်လာမယ်အဖေ´ ဟု အဖေကို အသံတိတ်စကားပြောနေမိသည်။
`မောင်လေး ဟိုရောက်ရင် အလုပ်ကိုကြိုးစား၊ အိမ်ကိုငွေမှန်မှန်ပြန်ပို့အုံး။ အရမ်းတွေ လျှောက်သုံးပစ် မနေနဲ့၊ နင့်ကို နိုင်ငံခြားပို့ဖို့ ဘယ်လိုလုပ်ထားရတယ်ဆိုတာ နင်သိတယ်နော်´ မမ က စိုးရိမ်စိတ်ဖြင့် တိုးတိုး တိုးတိုး မှာနေသည်။ မလေးရှားသွားဖို့ ကုန်ကျငွေအတွက် ကျနော်တို့အိမ်ကို အမျိုးတွေဆီမှာ ပေါင်ထားရတယ် ဆိုတာ ကျနော်သိတာပေါ့။
`သား … ဟိုမှာ သုံးနှစ်လောက် အလုပ်လုပ်ပြီးရင် သားတို့ အဆင်ပြေပါပြီ အမေ၊ သားလည်း ပြန်လာလို့ ရပြီပေါ့´ ငိုမဲ့မဲ့ ဖြစ်နေသည့် အမေ့ကို နှစ်သိမ့်စကားပြောပြီး ကျနော် လေယာဉ်ပျံပေါ် တက်ခဲ့၏။
နှစ်နာရီခွဲခန့် ပျံသန်းခဲ့သည့် လေယာဉ်ကြီး မလေးရှားမြေပေါ်ဆင်းလိုက်တော့ ခေတ်မီလှပတဲ့ လေယာဉ်ကွင်းကို မြင်ရသည်။ `ဒီလိုတိုးတက်နေတဲ့ နိုင်ငံမျိုးမှာ အလုပ်လုပ်လိုက်ရရင် ငါသူဌေးဖြစ်ဖို့ သိပ်မကြာတော့ပါဘူး´ ဟု တွေးရင်း အင်မီဂရေးရှင်းကို ရောက်လာသည်။ ပတ်စ်ပို့နှင့် စာရွက်စာတမ်းများကို စစ်နေသည်မှာ မပြီးနိုင်တော့။ နောက်ဆုံးတော့ လာကြိုမည့် သူဌေး ရောက်မလာ၍ လေယာဉ်ကွင်းမှာ ဖြစ်သလို တညအိပ်လိုက်ရပါသည်။
နောက်တနေ့မှာတော့ လာကြိုသည့် တရုတ်သူဌေးကားဖြင့် အလုပ်ဆင်းရမည့် စက်ရုံသို့ ဟိုင်းဝေး လမ်းမအတိုင်း ရောက်ရှိလာပါသည်။ စက်ရုံက မြို့တော်ဝန်းကျင်မှာ မဟုတ် တောပိုင်းကျသည့် Ipoh ဖက်မှာ ဖြစ်သည်။ စက်ရုံရှေ့ကားဆိုက်တော့ တကိုယ်လုံး ရွှံ့တွေပေနေသည့် မြန်မာအလုပ်သမားသုံးယောက် ထွက်ကြိုသည်။ သူတို့က လူဟောင်းတွေပေါ့။ စက်ရုံက အိုးလုပ်ငန်းလုပ်သည့်အတွက် သူတို့တကိုယ်လုံးမှာ ရွှံ့တွေ ပေနေသည်။ ကျနော်တို့မှာ ဘယ်ရှေးကံလဲမသိ၊ နိုင်ငံခြားမှာ အိုးလာဖုတ်နေရသည်။ ခက်တာက Basic pay မလေးရှားငွေ တနေ့ ၁၈ ကျပ်နှုန်း၊ အချိန်ပိုကလည်း မရှိဆိုတော့ တလလုံးအလုပ်ဆင်းပြီး လစာထုတ်တော့ ပွဲစားကြေး၊ ပါမစ်ကြေးတွေ ဖြတ်လိုက်ပြီး ကိုယ့်လက်ထဲ ၁၅၀ လောက်ပဲ ကျန်သည်။ အဲဒီငွေ နဲ့ တလစာ စားစားရိတ်ရှိသေးသည်။ သံရုံးကိုလည်း အခွန်ဆောင်ရအုံးမည် ဆိုတော့ အိမ်ကို ဘယ်လို ပို့မလဲ။
`တို့ ဘယ်လို လုပ်ကြမလဲ´ ကျနော့်ထက် ခြောက်လစောရောက်နေသော ဇော်မင်းကို မေးကြည့် သည်။ `တို့ ဒီစက်ရုံကနေ ထွက်ပြေးရမယ်၊ ဒီမှာဆိုရင် သုံးနှစ်လောက်လုပ်မှ အရင်းကြေလိမ့်မယ်၊ တခြားနေရာမှာ Basic pay နှစ်ဆယ် အစိတ် အနည်းဆုံးရနိုင်တယ်၊ အိုတီလည်း ရှိမယ်ဆို မဆိုးဘူး။ ကွာလာ လမ်ပူမှာ ငါ့သူငယ်ချင်းတွေ ရှိတယ်၊ အဲဒီကို သွားမယ်၊ ဒါပေမယ့် အဲလိုထွက်ပြေးရင် ပတ်စပို့က စက်ရုံမှာ ကျန်ခဲ့မှာ… ရဲ ပြဿနာ ရှိနိုင်တယ်။ ဒါပေမယ့် သူများတွေလည်း ဒီလိုပဲ ပြေးနေကြတယ်၊ မင်းစဉ်းစားပေါ့` ဟု ဇော်မင်းက အစီအစဉ်တွေ ပြောပြသည်။
နောက်ဆုံးတော့ အချိန်ကုန် လူပင်ပန်းပြီး ထမင်းစား ကျွန်ခံဘ၀ ဖြစ်နေသည်မို့ သီးမခံနိုင်တော့ပဲ ညဖက်မှာ အထုပ်ကိုယ်စီဆွဲ၍ စက်ရုံမှ ထွက်ပြေးလာခဲ့ကြတော့သည်။ ကွာလာလမ်ပူရောက်တော့ ဇော်မင်း သူငယ်ချင်းက ကျနော်တို့ကို ပွဲစားခ တယောက် သုံးရာယူကာ သူ့အလုပ်မှာပဲ ပြောပေးသဖြင့် ကျနော်တို့ အလုပ် ရသွားသည်။ စက်ရုံက စက်ဘီး စက်ရုံ၊ ဂဟေဆော်ထားသည့် စက်ဘီးဖရိမ်တွေကို ကျောက်စက်တိုက် ကော်ပတ်စားရသည်။ တခါတလေ အလုပ်နားချိန် ဂဟေဆော်တတ်အောင် ၀င်လေ့ကျင့်လို့ရသည်။ ဂဟေ ဆော်တတ်သွားလျှင် နောက်တရုံပြောင်းရင် ပိုက်ဆံပိုရနိုင်သည်။ ဒီစက်ရုံမှာလည်း Basic pay က တနေ့ အစိတ်နှင့် အိုတီလည်း ရှိသည်ဆိုတော့ ပွဲစားခသုံးရာ ပေးရတာ တန်ပါသည်။
ခက်တာက လကုန်လျှင် သူဌေးက လစာကို အကုန်မရှင်းပဲ borrow money ခေါ် ချေးငွေ တွေ သာ ထုတ်ပေးနေပါသည်။ စားဖို့သောက်ဖို့ မပူရပေမယ့် အိမ်ကို ငွေမပို့နိုင်သေးပါ။ အလုပ်သမားတွေကလည်း ကျနော်တို့လို တရားမ၀င်ဖြစ်သွားသော နိုင်ငံခြားသားအလုပ်သမားတွေက များတော့ သူဌေး လစာမပေးသည့် ကိစ္စ အစိုးရကို တိုင်ဖို့ဆိုတာကလည်း မဖြစ်နိုင်။ တနေ့ လစာပေးနိုးနိုးဖြင့် စောင့်နေရင်း သုံးလ ကြာသွားသည်။ သူဌေးကလည်း လစာရှင်းပေးမည့် အရိပ်အယောင်မရှိ၊ ကျနော်တို့ကလည်း ဘာလုပ်ရမှန်းမသိ ဖြစ်နေစဉ် တရက် စက်ရုံကို အော်ပရာစီ (အော်ပရေးရှင်း) ၀င်ပါတော့သည်။ ကျနော်တို့ အလုပ်သမားတွေရော သူဌေးပါ အဖမ်းခံရသည်။ သူဌေးက အာမခံနှင့် လွတ်သွားသော်လည်း ကျနော်တို့မှာ ရဲအချုပ်တွင် နှစ်ပတ်နေပြီးနောက် မလက္ကာကမ့်သို့ အပို့ခံရခြင်း ဖြစ်ပါသည်။
ရဲစခန်းအချုပ်တွင်နေစဉ်က နေ့ဖက်မှာအိုက်သောကြောင့် ဘောင်းဘီတိုနှင့် သမံတလင်းမှာ အိပ်ခဲ့သည် ဒဏ်၊ အခု ကမ့်ကိုရောက်တော့လည်း နေပူသည့်အခါ အရမ်းပူလိုက်၊ မိုးတွေရွာသည့်အခါ အေးသွားလိုက် ဖြစ်သည့် ဒဏ်နှင့် အိမ်က ကျနော်ပို့သည့်ငွေကို မျှော်နေတော့မှာပဲဟု တွေးကာ စိတ်မကောင်း ဖြစ်ရသည့် ဒဏ်တို့ဖြင့် ကျနော့် ကျန်းမာရေးများ ထိခိုက်လာပါသည်။
အပြင်မှာတော့ မိုးက စဲစပြုနေပြီ။ မနက်လေးနာရီမှာ သူတို့ လူလာစစ်ကြအုံးမည်။ ဒီကမ့်ကနေ ကျနော် ဘယ်တော့ အသွန်ခံရမလဲ၊ နယ်စပ်မှာ အသွန်ခံရပြီးရင် ဘာဆက်လုပ်ရမလဲ၊ သူဌေးဆီမှာ ကျန်ခဲ့တဲ့ လုပ်ခလစာလေးတွေ ဘယ်လို ပြန်တောင်းရမလဲ… မရေရာသော အတွေးများကြောင့် ကျနော့် ရင်မှာ လေးလာပါသည်။ မြန်မာပြည်မှာတုံးက မက်ခဲ့တဲ့ ကြည်နူးဖွယ် မလေးရှား အိမ်မက်လေးတောင် မမက်မိတာ အတော်ကြာသွားပြီကို ကျနော်သတိပြုမိသည်။ လောလောဆယ် ကျနော့် အိမ်မက်ဆိုးထဲမှာတော့ အ၀တ် တထည်ကိုယ်တခုနဲ့ မလက္ကာကမ့်ထဲမှာ ရင်တွေပူပြီး ခြေဖျားလက်ဖျားတွေအေးလို့ အဖျားတက်နေတဲ့ လူငယ်လေးတယောက်သာ ရှိပါတော့သည်။ ။

မလေးရှားရောက် လူငယ်တဦး